Síðustu dagar hafa einkennst af of mikilli vinnu og minni svefn. Ég er reyndar fegin að Hönnunarmars sé búinn svo önnur verkefni fái minn tíma, t.d. stórskemmtilega Nude Magazine verkefnið sem ég er á fullu í núna:) Við ætlum reyndar bara að byrja smátt sem er gott, því að góðir hlutir gerast nefnilega hægt! Við erum búnar að mynda hjá tveimur stórglæsilegum píum og svo hef ég verið í kvöld að raða saman “stöff” síðum sem er eitt það allra skemmtilegasta sem ég geri.

Svona ljósasería er á óskalistanum, ótrúlega töff og sómar sér vel inni og úti! Ætli það sé hægt að kaupa svona hér heima?

Svo eru falleg gleraugu ekki aðeins á óskalistanum heldur frekar á neyðarlistanum. Mín eru nefnilega tvíbrotin og því bera þau nafnð “nördagleraugu” með rentu þessa dagana þar sem að þau eru TEIPUÐ. Allar ábendingar um besta úrvalið af gleraugum eru vel þegnar:)

Hollur matur þarf að eignast stærra pláss í mínu lífi þessa dagana, ólétta konan hefur nefnilega aðeins verið að missa sig síðustu mánuði:)

Vorið er loksins komið og ég bíð spennt eftir blómunum, eitt stykki blómvöndur í vasa lífgar nefnilega öll heimili við! Ása Regins ætti að vera búin að kenna okkur það;)

Það var ekki fleira í bili, vonandi hafið þið öll það gott:)

-Svana

Ein uppáhaldsspurningin mín þegar ég hef tekið viðtöl við t.d. hönnuði er hvort sé mikilvægara, fegurð eða notagildi? Oft þarf að gæta viss jafnvægis í þessu þó að ég falli æ oftar fyrir fallegum hlutum sem hafa nákvæmlega ekkert notagildi. Núna tel ég mig svona almennt meðvitaða um að kaupa mér ekki ljóta hluti og reyni eins og ég get að takmarka slíka hluti á heimilinu.

Þó er einn hlutur á heimilinu alveg afskaplega ljótur að mínu mati, en notagildið er það gott að ég hef ekki tímt að losa mig við hann! Það er þetta skartgripatré frá Ikea sem er inni á baðherbergi…

Þetta er alveg afburðar ljót hönnun að mínu mati en hún fær þó eflaust að fylgja mér áfram í einhvern smá tíma. Nema einhver geti bent mér á betra og fallegra skartgripatré en þetta, þá skal ég glöð skipta þessu út!

P.s. eruð þið að tékka á bleiku fínu stöfunum í bannernum? Ég ákvað að skella blogginu í smá andlitslyftingu:)

Mig langar til að deila með ykkur fjórum sniðugum DIY verkefnum sem eru á to do listanum mínum:) Það er orðið alltof langt síðan að ég dundaði mér við svona verkefni en það lítur út fyrir að langþráð eyða í dagatalinu mínu komi upp í komandi viku svo það verður spennandi að sjá hvort ég dragi upp spreybrúsann.

Ég er ekki mikið í því að spreyja heilu húsgögnin en minni hlutir heilla mig þó, -mögulega því það er ekki tímafrekt!

Ég hef birt þessa mynd áður, en þetta er ennþá góð hugmynd! 

Ég elska þessa hugmynd alltaf jafn mikið, að líma plastdýr á gamlar glerkrukkur og mála. Hægt að nota undir hvað sem er, skart, föndurdót, hafra..nammi?

Herðatré á hvolfi hefur ekki enn verið hengt upp á mínu heimili þrátt fyrir að hafa átt sæti á to do listanum í langan tíma. Ég sé alveg fyrir mér svipinn á Andrési þegar ég sýni honum stolt hvað ég var að hengja upp haha!

Seglar á ísskáp spreyjaðir í töffaralegum koparlit! ahhhh já það er bara of flott til að nenna ekki að prufa!

Vonandi var helgin ykkar ljúf, vonum svo að þessi to do listi styttist á næstu dögum og þá sýni ég afraksturinn:)

-Svana

Nokkrar myndir sem veita mér innblástur þessa stundina. Öll heimilin eru frekar hvít sem ég heillast alltaf  jafn mikið af, svo mikil ró yfir þessum myndum og ekkert auka drasl.

Sem minnir mig á það að ég þarf alvarlega að fara að taka til hér heima:)

Ein af mínum uppáhalds instagram síðum er hjá @frustilista, eða með réttu nafni Jenny Hjalmarson sem er sænskur innanhússstílisti.

Ef ykkur vantar innblástur í símann þá mæli ég með henni:)
Svo ef þið viljið fylgja einum frekar lélegum instagrammara þá er ég með @svana_

;)

Það styttist í 20 vikna sónarinn hjá mér og því má ég leyfa mér aðeins fleiri barnaherbergjapælingar. Í draumaveröld þá ætti ég stærri íbúð með aukaherbergi þar sem ég gæti gert svona fallegt barnaherbergi. En staðan er víst ekki þannig svo það eru bara draumar í augnablikinu:)

Ég er ennþá ótrúlega heilluð af svona indíánatjöldum, en hugmyndin til hægri hvernig hillan er afmörkuð með lit er alveg frábær.

Ég hef margoft sýnt doppótta veggi, en þessar pínulitlu doppur eru einstaklega fallegar og látlausar.

 Ský úr vír og litlir krúttlegir barnaskór hengdir upp til skrauts:)

Þetta eru reyndar einfaldar hugmyndir sem þurfa kannski ekkert sér herbergi. Kannski er það bara rugl í mér að það sé “möst” að eiga aukaherbergi, ef ég finn skipulagshliðina í mér sem ég týndi fyrir dágóðu síðan þá reddast þetta eflaust!

-Svana

Styrktarfélagið Göngum saman sem styrkir grunnrannsóknir á brjóstakrabbameini mun í apríl selja lyklakippu sem fatahönnuðurinn Hlín Reykdal hefur hannað fyrir félagið og mun ágóði af sölunni renna í rannsóknarsjóð félagsins.

Hlín Reykdal er óþarfi að kynna svo þekkt er hún fyrir hönnun ýmiskonar fylgihluta svo sem hálsmena og armbanda. Hún útskrifaðist frá Listaháskóla Íslands 2009, með B.A. gráðu í fatahönnun og er einn af eigendum og stofnendum verslunarinnar KIOSK sem er á Laugavegi 65.

Í tilefni af 5 ára afmæli Göngum saman fyrir tveimur árum hannaði Hlín armbönd fyrir félagið. „Það var stórkostlegt að koma að styrkveitingu félagsins um haustið þar sem ungur vísindamaður fékk milljónina sem armböndin mín gáfu af sér til að rannsaka brjóstakrabbamein – rannsókn sem einn daginn gæti stuðlað að lækningu. Mig langaði því til að endurtaka leikinn. Þetta er svo skemmtilegt og gefandi verkefni og dásamlegt að fá að vinna með svona sterkum og dugmiklum konum eins og eru í Göngum saman.“

Gunnhildur Óskarsdóttir formaður Göngum saman, segir framlag Hlínar mikils virði fyrir félagið. „Það er heiður fyrir okkur að svona góður hönnuður kjósi að leggja okkur aftur lið með þessum hætti. Við erum afskaplega hrifnar af vörum Hlínar og lyklakippan – sem einnig er hægt að nota sem töskuskraut – er falleg og vönduð og frábær gjöf. Það verður auk þess leikur einn að finna lyklana í þeim frumskógi sem venjulegt kvenveski vill stundum vera.“

Í dag, fimmtudaginn 10. apríl verður hamingjustund í versluninni Kiosk á Laugavegi 65 frá klukkan 17 til 19 þar sem lyklakippan verður frumsýnd. Lyklakippan verður í framhaldinu til sölu í versluninni Kiosk út apríl eða meðan birgðir endast.

…

Ætlum við ekki allar að styrkja þetta verðuga málefni og næla okkur í svona fallega lyklakippu í leiðinni?

:)

Stundum er svo ótrúlega hressandi að hugsa aðeins út fyrir kassann og gefa hlutum sem þú átt nýtt hlutverk. Rakel vinkona er dálítið sniðug og sýndi mér að ég þarf svo sannarlega ekki að sitja uppi með Ikea skartgripatréð sem ég bloggaði um daginn -sjá hér. 

Hún notaði geómetrískt skraut sem hún átti til, ekkert sérstakt notkunargildi í því en það var alltaf ofan á skenk sem punt. Þessu var skellt upp á vegg og þjónar núna þeim tilgangi að vera svona líka fínt skartgripahengi:)

Svooo sniðugt!

Skrautið keypti hún á sínum tíma í Next Home, en það má að sjálfsögðu nota ímyndunaraflið og nota aðra hluti.

 Ég er búin að eyða dágóðum tíma á Pinterest í kvöld, -sjá hér.

Ég heillast alltaf jafn mikið af hvítu, eins og þið hafið líklega þegar tekið eftir. Þessi mynd birtist í Elle Decoration fyrir löngu síðan, hvernig bókunum er staflað undir og ofan á skenknum finnst mér koma vel út. Sem og Mirror Ball ljósið eftir Tom Dixon og hvítt+viðar mix af stólum.

“Furniture should be useful and work hard. The dinner table should be at the heart of the home, large enough to accommodate family meals, dinner parties, homework or other pastimes. When it comes to your sofa, spend as much as you can afford. As this is probably going to be one of your biggest investments, opt for something classic that will stand the test of time.” 

:)

Helginni var eytt í ýmislegt skemmtilegt og annað ekki svo skemmtilegt, gleraugnaleit! Það er fátt sem mér finnst meira krefjandi en á sama tíma leiðinlegt, það er að finna mér ný gleraugu. Þau sem ég er með á mér núna eru límd með límbyssu á tveimur stöðum, speglavörnin er að flagna af og þau eru svo rispuð að ég sé ekki skýrt ennþá…það var því kominn tími á nýjar brillur:)

Eftir að hafa mátað u.þ.b. 300 umgjarðir fann ég þessi fjögur sem ég tók í heimlán og eftir að hafa rætt þau fram og tilbaka við fjölskylduna er ég loksins komin á niðurstöðu!

Það er frekar mikill verðmunur á dýrustu og ódýrustu týpunni hér að ofan sem hafði að lokum mikið að segja þar sem að ég er að leggja fyrir komandi kostnaði með stækkandi fjölskyldu:) Svo eru þau sem ég er með núna líka frá Chanel svo það er fínt að breyta til. Já, Ray Baninn varð fyrir valinu!

Helginni var svo lokið með yndislegri sunnudagsferð með fjölskyldunni á Þingvelli. Þessi snúður hér að ofan er í miklu uppáhaldi hjá mér en hann er sonur systur minnar:)

Á morgun verður líka frábær dagur, en þá kemur út í fyrsta skipti stækkað Nude Magazine með nýja kaflanum mínum:)

Vonandi var helgin ykkar góð!

-Svana

Ég er ótrúlega ánægð og stolt af nýjasta tölublaði NUDE Magazine sem var að koma út rétt í þessu, það hefur verið bætt við nýjum kafla sem ber heitir NUDE Lifestyle, en eins og nafnið gefur til kynna er þar að finna allskyns lífstílstengt efni, og þar ber hæst ýmislegt efni um HÖNNUN & HEIMILI sem ég ritstýri.

Við heimsóttum tvær ofurkonur sem eiga það sameiginlegt að vera báðar innanhússhönnuðir, tókum viðtal við einn flottasta grafíska hönnuð í Svíþjóð, sýnum það besta frá HönnunarMars og kíkjum í búðir ásamt ýmsu fleiru.

Ég hef sjaldan verið jafn ánægð með einhverja vinnu sem ég skila af mér, þetta er 100% minn smekkur sem þarna er að finna, svo þið ykkar sem kunnið að meta hann munið líka elska þennan kafla sem er bara rétt að að byrja sitt líf núna:) Það er nefnilega sagt að góðir hlutir gerast hægt og því er ég svo sannarlega sammála.

Ég mæli með að þið kíkið á þetta fallega blað -þemað í þetta sinn er Wedding, svo þið ykkar sem eruð að fara að gifta ykkur á þessu ári megið ekki láta blaðið framhjá ykkur fara.

Njótið njótið njótið!

Þess má geta að nýji kaflinn byrjar á blaðsíðu 102 en fram að því má njóta þessa að lesa allt um tísku, förðun og allt það sem viðkemur brúðkaupum!

:)

Ég er aðeins að reyna að breyta til í stofunni hjá mér núna en hef reyndar ekki komist mikið lengra en það að taka sjónvarpið úr sambandi og niður á gólf, mikið er ég eftir að verða vinsæl haha! Við bara horfum svo lítið á sjónvarp og notum helst tölvurnar okkar fyrir bíómyndir svo ég sé hreinlega ekki tilgang þess að eiga sjónvarpstæki sem sýnir í þokkabót bara Rúv:)

Ég keypti mér nefnilega kommóðu á klink á Barnalandi í gær, hélt ég væri að kaupa tekkkommóðu miðað við myndina en sit núna uppi með heldur ljóta brúna viðarkommóðu frá ameríska hernum. Þangað til að ég eignast draumatekkmubbluna eða að ég splæsi í String hillukerfið í Epal þá leyfi ég kommóðunni að búa hjá mér í smástund. Mér skilst að ég þurfi aukageymslupláss fyrir barnið.. ekki barnið sjálft heldur allt sem fylgir því, og því langar mig til að fækka öðrum ljótum mubblum í bili úr litlu stofunni minni eins og tv-inu. Er það ekki bara 100% eðlilegt, nei ég bara spyr?:)

Draumastofan væri hinsvegar svona:

 Og þarna er sko ekkert sjónvarp! :)

Myndirnar stíliseraði Annalena fyrir Blooc. /sjá hér.

Fyrir nokkrum dögum síðan fékk ég að vita það að við eigum von á litlum strák í lok sumars, mjög skemmtilegar fréttir og það gerir mér líka auðveldara fyrir að sjá þetta allt fyrir mér, -ekki það að heimurinn skiptist í bleikt og blátt:) Ég er búin að vera í því að sanka að mér enn fleiri myndum og er farin að skoða rúm og önnur húsgögn sem ég þarf að bæta við mig, -meira um það síðar. Einn stærsti kosturinn er þó sá að núna fæ ég enn meira barnadót frá systur minni en sonur hennar verður einmitt eins árs í lok sumars og verður hættur að nota ýmislegt:)

…svo er ég líka svo heppin að ég er umkringd strákamömmum svo það verður ekki langt fyrir mig að sækja ráð;)

Njótið páskafrísins!

Ég er svo hrikalega ánægð með það að sænska merkið Prettypegs sé komið í sölu á Íslandi! Ég var að rekast á þær fréttir rétt í þessu en ég var einmitt í gærkvöldi að ræða þetta fyrirtæki afþví að ég var að kaupa mér gamla kommóðu á netinu sem vantar á fætur. Prettypegs eru reyndar sérhannaðar fætur undir Ikea húsgögn en ég var að láta mig dreyma um að koma þeim undir gamla tekk mublu, -þó ég efist um að það sé hægt. Ætli Ikea sófinn minn verði þá ekki fyrir valinu en mig hefur dauðlangað að prófa svona fætur frá því að ég sá þær fyrst á netinu fyrir löngu síðan:)

Fyrir áhugasama þá munu Prettypegs fást hjá Snúran.is stuttu eftir páska, en ég rakst á þessa frétt á facebook síðu þeirra hér.

Mega fínt?:)

Ég fann loksins tekk kommóðuna sem ég var að leita af á bland.is og er búin að selja þá sem að ég keypti í síðustu viku! Það mun þó fara dálítil vinna í þessa, en við ætlum að pússa málninguna af og setja undir hana fætur. Mögulega fæ ég Andrés til að renna undir hana tekkfætur, en ég er þó reyndar líka að íhuga Estelle týpuna frá Prettypegs sem eru í tekkstíl og spara okkur smá vinnu:)

Ég þurfti smá að sannfæra Andrés um fegurð þessarar kommóðu, en ég sé hana alveg fyrir mér hversu flott hún verður eftir smá pússerí. Upphaflega planið var reyndar að fara með hana í afsýringu, en fyrirtækið sem ég var með í huga er í tímabundri pásu alveg típískt! En heppin ég að eiga eitt stykki húsgagnasmið hér heima sem rúllar þessu upp;)

Hversu marga daga ætti ég að gefa honum í þetta haha…

Það fyrsta sem ég hugsaði þegar ég vaknaði í morgun var að ég yrði að eignast blóm! Hvað gera konur þá? Jú þær smella sér bara út í búð og kaupa nokkur handa sjálfri sér:)

Tvær pottaplöntur urði fyrir valinu og búnt af túlípönum sem reyna núna öll að lifa af nagið í Betúel!

 Það sem að smá grænt gerir fyrir heimilið, það lítur nefnilega allt betur út með nokkrum plöntum:)

En sumargjöfin var þó þessi fagri lampi sem ber heitið Flower Pot og var hannaður af Verner Panton árið 1968. Mig hefur langað í hann alveg gífurlega lengi og fannst ég svo sannarlega eiga hann skilið í gær.

Er eftir að finna fyrir hann rétta staðinn, en þangað til fær hann að standa úti í glugga í sólarljósinu þar sem að engin þörf er á lampa!

Gleðilegt sumar,

-SVANA

*Uppfært* Ég var að fá ábendingu um að t.d. Friðarliljan sem ég keypti sem og túlípanarnir séu eitraðir fyrir dýr svo ég mæli ekki með að kaupa slíkt ef þið eigið dýr sem eru hrifin af því að naga plöntur. Frekar upplýsingar um plöntur sem eru eitraðar fyrir dýr hér, og hér má sjá lista yfir hentugri plöntur fyrir dýraeigendur.

Ef sunnudagar eru ekki til baksturs þá veit ég ekki hvaða dagur er það. Þið hafið öll eflaust tekið eftir rósaköku æðinu sem margir eru haldnir, en ég er búin að finna nýja áskorun handa öllum rósaköku snillingunum þarna úti. Það eru þessar kökukremrósir…

Einstaklega fallegar rósakökur, en eflaust mikil nákvæmnisvinna:)

Hver ætlar að prófa?

Frekari leiðbeiningar má finna á bloggsíðunni Twigg studios.

Við hjúin vorum að taka þá ákvörðun að flytja enn eina ferðina eftir að hafa dottið niður á hina fullkomnu íbúð handa okkur. Ég var búin að lofa sjálfri mér að staldra allavega við í smástund hérna, en það eru einungis komnir um 8 mánuðir frá síðustu flutningum og ég er ekki mjög spennt fyrir því að pakka aftur niður.

Næsta íbúð er þó með aukasvefnherbergi fyrir barnið, en það er ekki það besta! Með íbúðinni fylgir nefnilega 25 fm vinnustofa í garðinum svo við getum bæði loksins farið að vinna að okkar eigin verkefnum. Eitthvað sem mig hefur dreymt um alltof lengi. Það er ekki hægt að láta slíkt framhjá sér fara!

Það hljómar mögulega mjög væmið, en ég er eitthvað svo ótrúlega glöð í hjartanu yfir þessu öllu og hvað einn og einn draumur er að rætast í einu. Það tekur jú allt sinn tíma en það stefnir þó allt í rétta átt. Ég er svo ánægð að hafa hætt í vinnu sem hélt aftur af mér til að sinna mínum eigin draumum, og þvílíkt frelsi sem það er. Ég mæli svo sannarlega með að hlusta á sjálfan sig í einu og öllu hvað slíkt varðar.

Aðeins mánuður í nýja heimilið og flutninga númer 8 frá árinu 2008. Ég ætla reyndar að vera smá súkkulaðikleina í þetta skiptið og sé kannski bara um að raða upp úr kössum og passa að flutningarmaurarnir mínir hafi það sem best:)

-Svana

Ég verð að deila með ykkur þessu gullfallega heimili sem ég var að rekast á, það fer ekki á milli mála að þarna býr mikill hönnunarunnandi. Hin norska Julie Hole hjá Villa H býr þarna en hún er einnig penni á einni af mínum uppáhaldsbloggsíðum Stylizimo. Stíllinn hennar er eitthvað sem ég gæti vel búið við, hvítt í grunninn og með bleikum tónum hér og þar, -jú bleikur gerir nefnilega allt aðeins fallegra;)

Hún á alveg ágætis safn af fallegri hönnunarvöru og er greinilega smekkkona mikil!

Höfum við ekki alveg smekk fyrir svona heimilum?:)

Mig langar svo til að deila með ykkur þessum myndum úr innlitinu frá Auði Gná sem birtist í síðasta tölublaði Nude Magazine. Auður Gná er innanhússhönnuður og mikil smekkdama, en hún rekur ótrúlega fallega sérvöruverslun á Skólavörðustíg sem ber heitið Insula. Ég kolféll fyrir þessum spegli sem sjá má á myndinni hér að neðan, en hann var kynntur á Hönnunarmars í Epal fyrir stuttu, í kjölfarið varð ég svo áhugasöm að taka viðtal við Auði sem startaði nýlega sínu eigin hönnunarmerki Further North og fékk hana til að bjóða mér í heimsókn.

Það sem ég elska við heimilið hennar Auðar er samansafnið af öllum þessum hlutum sem þú veist ekki alveg hvar þú getur nálgast, þetta er alveg fullkomin blanda af klassískri hönnun í bland við gamla og góða hluti sem hafa sögu. Stíllinn hennar er mjög persónulegur og segist hún sjálf vera mikill grúskari og elskar góða flóamarkaði.

Heimilið hefur tekið miklum breytingum frá árinu 2006 þegar hún flutti inn, en þá var íbúðin skráð sem herbergi í risi. Eldhúsið sem er algjör draumur hannaði Auður sjálf og lét hún einnig setja í þennan hringlaga glugga sem setur mikinn svip á heimilið.

Eitt af uppáhaldsheimilunum sem ég hef heimsótt:)

Ég mæli með fyrir ykkur sem enn hafið ekki kíkt á nýja kaflann okkar Theódóru -Nude lifestyle, að gera það núna:)

Við erum einmitt á fullu þessa stundina að leggja lokahönd á næsta tölublað af Nude Magazine! Efnið sem við erum með í höndunum er algjör gullmoli, en við heimsóttum t.d. tvær ofursmekklegar píur og mynduðum heimilin þeirra, önnur þeirra er búin að slá í gegn sem fatahönnuður og hin stefnir í sömu átt! Hmmm spennandi ekki satt?;)

Ég ætla að skunda núna upp í sumarbústað í smá afslöppun, og við heyrumst á sunnudaginn!

Eigið góða helgi.