Eins og ég kom inn á í færslunni hér að framan þá rakst ég á svo fallegt instagram á smá netvafri í kvöld. Bjartur er sofnaður, Andrés er í bíó og þá er fullkominn tími fyrir mig til að sitja uppi í rúmi með tölvuna í fanginu og vafra um netið í leit af innblæstri fyrir heimilið. Þegar maður eyðir orðið svona miklum tíma heima hjá sér ( jú orlofið) þá fer maður enn meira að huga að heimilinu, svona ef það var hægt. Listinn lengist af hlutum sem manni “bráðvantar” og nokkrum sem hreinlega vantar í alvöru. Eins skemmtilegt og það er að uppgötva svona smekkkonur úti í heimi sem deila sama smekk og maður sjálfur, þá fylgir þessu jú alltaf löngunin að breyta og bæta við heimilið sitt sem er hreinlega ekkert alltaf svo jákvætt:)

Hin norska Ingrid Pallesen er smekkkonan að þessu sinni, hana má finna á instagram @ingridpall

Ingrid hefur augljóslega mikið dálæti á hönnunarklassík, PH Snowball ljósið er þó toppurinn á þessari mynd:)

Nei sko, uppáhaldsrúmfötin mín:)

String hillur og Menu veggkertastjakar.

Sófahornið er huggulegt.

Hér má sjá hvernig borðið leit út áður en sett var á það marmarafilma,

Ég er ofsalega skotin í svarta Lyngby vasanum á stofuborðinu og gæti vel hugsað mér einn slíkann hingað heim, þá í hvítu:)

Smekkkonur eins og Ingrid eru með Hay mottu sem baðmottu…

Lyngby vasinn fær greinilega að flakka á milli staða á heimilinu:)

Royal Copenhagen matarstell á þessu heimili en ekki hvað:)

Ég varð að leyfa einni jólamynd að fylgja með frá því í fyrra, ég er nefnilega orðin svo spennt að fá jólatré í fyrsta skipti (það skal takast í ár) að það nánast ískrar í mér:)

Er ég nokkuð ein um það að vilja taka til-færa hluti-bæta og breyta til þegar ég sé innlit sem falla svona vel að mínum smekk?

Ég fékk fyrirspurn í tölvupósti varðandi hvaða sængurgjafir hafa staðið uppúr hjá mér sem ég fékk eftir að Bjartur fæddist, oft veit maður ekkert hvað manni vantar eða jafnvel hvað maður eigi að gefa sjálfur vinkonum sínum. Ég ákvað að svara fyrirspurninni með stuttri færslu til að fleiri njóti (og til að ég fái afsökun til að birta eina krúttmynd af Bjarti).

Ég fékk Babynest frá einni vinkonu minni í gjöf sem hefur komið sér einstaklega vel og verið notað frá fyrsta degi. Bjartur sefur á milli okkar uppi í rúmi í þessu og er í leiðinni mjög öruggur, mér líður líka betur vitandi það að ég geti ekki velt mér óvart á hann í svefni. Svo færi ég það yfir í vögguna hans á daginn en það fer mjög vel um svona lítil kríli með smá stuðning við sig. Án efa ein uppáhaldsgjöfin okkar:)  Á Íslandi er Petit.is söluaðili.

Á myndinni má líka sjá gírafann sem hann fékk frá vinkonum mínum í gjöf og hann sofnar við hann öll kvöld en það er hægt að velja um nokkur róandi hljóð. Ég geri ráð fyrir að flestar barnavöruverslanir selji þennan fína gíraffa:)

Svo þykir mér mjög vænt um þetta hálsmen sem ég fékk frá mömmu daginn sem við komum heim af spítalanum en á því stendur Mamma. Það er frá Siggu & Timo en ég fór svo með það og lét bæta á hina hliðina nafninu hans og fótspori sem var tekið af honum uppá fæðingadeild. Pínulítið og krúttlegt:)

Þessar gjafir hafa mikið verið notaðar ásamt auðvitað svo mörgum öðrum fallegum gjöfum sem við/hann fengum.

x svana

Instagramsíður eru á vissan hátt eins og gott ókeypis tímarit, hægt er að eyða þar tímunum saman að skoða síður hjá smekkfólki útum heim allan, en það eru þónokkrar íslenskar síður sem ég held uppá. Þórunni Högna kannast flestir við, enda landsþekkt smekkkona sem ritstýrir núna sínu eigin tímariti, Home Magazine. Það kemur ykkur því varla á óvart að instagramsíðan hennar sé mjög smekkleg og hægt er að fá margar hugmyndir þaðan, tjahh eða smá jólafíling því hún virðist hafa þjófstartað aðeins jólunum:)

Dásamlegar myndir og þessar pallíettuflíkur eru draumur ♡

Fleiri myndir á @thorunnh71 

x Svana

Fylgstu endilega með Svart á hvítu á facebook -hér 

Gangurinn á heimilinu er loksins hættur að vera alveg tómur og nokkrar myndir hafa verið hengdar upp og meðal annars þessi fíni fugl. Það er orðið dálítið síðan að ég stoppaði hann upp, en hann hefur aldrei fengið að fara upp á vegg fyrr en núna nýlega. Ég er mjög hrifin af uppstoppuðum dýrum þó að það sé alls ekki allra sem ég skil mjög vel. Fuglinum var skellt upp á nagla sem var þarna fyrir svo ég er eftir að ákveða mig betur hvort að fiðrildamyndirnar fái að vera þarna líka, mér finnst eitthvað furðulegt við að hafa bæði fugl og fiðrildi á sama vegg, en það er kannski bara ég?

Þegar gengið er út úr forstofunni þá er þetta það fyrsta sem þú sérð á heimilinu, þetta áhugamál mitt fær alltaf misjafnar undirtektir sem ég hef þó vanist. Það er jú ekki hægt að geðjast öllum:)

Svo var ég búin að skipta út Scintilla myndinni sem var fyrir ofan sófann og núna prýðir hún ganginn:)

Fylgstu endilega með Svart á hvítu á facebook -hér 

Ég rakst á einstaklega skemmtilegt stílistaverkefni á dögunum þar sem að sænska fasteignasalan Fastighetsbyran fékk til liðs við sig þrjá þekkta stílista sem stíliseruðu sömu íbúðina hver á sinn hátt. Þessi hugmynd er algjörlega æðisleg og útkoman frábær og ættu flestir að geta tengt við rýmin sem þið sjáið og mögulega séð fyrir sér að vilja búa þar. Mikið væri skemmtilegt að sjá íslenska fasteignasölu reyna við þetta verkefni.

Tina Hellberg stíliseraði íbúðina í klassískum en töffaralegum skandinavískum stíl.

Hans Blomquist stíliseraði íbúðina í hlýlegum rustic stíl.

Mikael Beckman stíliseraði íbúðina í klassískum sænskum stíl, mjög mikið í takt við stílinn hjá Svenskt tenn (sem er ein þekktasta innanhússhönnunarverslun í Svíþjóð frá 1924.)

Hver er ykkar uppáhalds?

x Svana

Fylgstu endilega með Svart á hvítu á facebook -hér 

Núna er að fara í gang skemmtilegur aðventukransaleikur Hrím & Trendnet þar sem hægt verður að vinna sér inn 20.000 kr. gjafabréf í Hrím sem mun svo sannarlega koma sér vel fyrir jólin. Við viljum fá að sjá hvernig þið gerið aðventukransa og ætlum því að efna til smá keppni!

Það eina sem þarf að gera til að taka þátt er að vera með kertastjaka eða bakka frá Hrím og skreyta þá á skemmtilegan hátt og merkja svo myndina #TRENDHRIM & #hrimjol2014 á Instagram.

Þau í Hrím tóku sig til og skreyttu nokkra kertastjaka til að sýna lesendum Trendnet og gefa jafnframt góðar hugmyndir. Það er nefnilega svo gaman að geta nýtt það sem maður á fyrir en bæta svo við einföldum og fallegum skreytingum.

“Nýja String jólastjakann frá Ferm living þarf nú varla að skreyta en til að gera smá dúllerí fannst okkur koma vel út að setja slaufur úr snæri. Þennan stjaka má svo að sjálfsögðu nota allt árið.”

“Geo vírastjakinn frá Bloomingville hefur verið vinsæll hjá okkur svo það eiga hann eflaust margir. Greni og kanill gefur góðan ilm og rauðu kertin gera hann alveg extra jóló.”

“Designletters Expresso bollana má nota í ýmislegt annað en að drekka kaffi. Okkur fannst fallegt að setja snæri utan um bollana og svo skreyttum svo með greni og klipptum út laufblöð úr gömlu jólablaði, súper einfalt og ódýrt! Hægt að gera þennan persónulegan með því að klippa laufblöð úr því sem maður á.”

“llumina stjakinn frá Kahler er svo skemmtilegur að því leiti að hann er með smá skál. Þetta er skemmtilegur árstíðastjaki sem hægt er að leika sér með. Við settum brjóstsykur sem við tengjum við jólin og kanilstangir til að fá góða lykt.”

“Hér eru marmarastjakar frá Ferm Living settir á Bloomingville viðarbakka og greni lagt á bakkann. Við vildum hafa þennan frekar látlausan en svo fannst okkur vanta smá glingur þannig að við settjum demantaóróa frá Louise Roe í miðjuna til að setja punktinn yfir i-ið.”

20.000 kr gjafabréf í Hrím verður svo veitt í verðlaun fyrir flottasta kransinn þann 28. Nóvember.

Núna er um að gera að leyfa hugmyndafluginu að leika lausum hala og koma sér almennilega í jólagírinn með því að gera aðventukransinn kláran.

 Hægt er að skoða alla stjakana á Hrím.is.

Munið svo að merkja myndina #TRENDHRIM & #hrimjol2014

Það er ekki oft sem að leikfang situr á óskalistanum mínum, en ég vil þó reyndar meina að þetta sé á óskalistanum hans Bjarts. Vilac sparkbíllinn er eitt fallegasta leikfang sem ég hef séð og ég var aldeilis komin með augastað á honum áður en að litli kom í heiminn og ég veit að pabbinn er líka mjög spenntur fyrir þessum bíl. Bíllinn er nefnilega svo miklu meira en bara leikfang því hann er í leiðinni fallegt heimilispunt og það er ekki oft sem það er hægt að segja um leikföng.

Bíllinn kemur frá franska fyrirtækinu Vilac sem stofnað var árið 1911.

Elegant & fallegt gæðaleikfang.

Fyrir áhugasama þá er vefverslunin I am happy.is söluaðili Vilac á Íslandi, en þau fögnuðu einmitt 2ja ára afmæli í dag!

Talandi um afmæli, mér tókst í dag að ákveða vinning í afmælisgjafaleik bloggsins, þið eruð eftir að tryllast úr spenningi, ég þarf bara að ganga frá nokkrum lausum endum og þá keyrum við hann í gang!

Eigið góða helgi:)

Fylgstu endilega með Svart á hvítu á facebook -hér 

Ef það vill svo skemmtilega til að þið séuð stödd í Kaupmannahöfn um helgina þá mæli ég með að kíkja á hönnunarsýninguna Blickfang. Íslenska hönnunarfyrirtækið Scintilla er einmitt að sýna vörurnar sínar þar um helgina en fyrir áhugasama þá eru þau staðsett á bás 1.23.

Það hefur eflaust ekki farið framhjá ykkur dálæti mitt á þessum vörum, svo ég vona svo sannarlega að þau nái að heilla gesti sýningarinnar svo fleiri fái að njóta:)

Blickfang sýningin fer fram í Øksnehallen á Vesterbro þann 15. og 16.nóvember frá kl. 10-18.

:)

Hin sænska Anna Malin er smekkkonan að þessu sinni, hún starfar sem grunnskólakennari á daginn og sinnir áhugamáli sínu -að blogga á kvöldin. Hér býr hún ásamt eiginmanni sínum og tveimur sonum á þessu fallega heimili sem staðsett er í Helsingborg. Það er hægt að fylgja Önnu á instagram @heltenkelt eða skoða fallegt blogg hennar, hér fyrir enn meiri innblástur.

Dásamlega fallegt heimili og fullt fullt af fínum hugmyndum:)

Vonandi var helgin ykkar góð!

Þrátt fyrir að hafa verið hannaður á áttunda áratugnum þá er lampinn 265 sem Paolo Rizzatto hannaði fyrir Flos alveg að toppa sig í vinsældum um þessar mundir. Það er ekki hægt að fletta einu hönnunartímariti í dag án þessa að rekast a.m.k. einu sinni á þennan lampa, enda gullfallegur og afar formfagur. 

265 lampinn var hannaður árið 1973 og eldist hann eins og gott rauðvín.

Flottur lampi ekki satt!

Fylgstu endilega með Svart á hvítu á facebook -hér 

Þið kannist eflaust flest við Ingibjörgu Hönnu, en ef ekki þá þekkið þið pottþétt verkin hennar. Krumminn er líklega ein þekktasta íslenska hönnunin sem gerð hefur verið, um hann hefur verið fjallað í fjölmörgum erlendum tímaritum og fæst hann víða um heiminn ásamt því að prýða ótalmörg íslensk heimili. Ingibjörg Hanna gefur núna út nýja útgáfu af Krumma og fatahenginu Ekki Rúdolf sem einnig hefur notið mikilla vinsælda. Í nýju útgáfunni nýtur viðurinn sinn vel og eflaust margir sem gleðjast yfir þessum fréttum!

Ekki Rúdolf er flottur undir skartgripi eða uppáhaldsflíkurnar,

Ég er mjög hrifin af þessum nýju útgáfum ♡

Hér er ein lítil og krúttleg stofa/borðstofa sem gefur nokkrar góðar hugmyndir,

Ég er sérstaklega hrifin af veggnum með boxhillunum í bland við innrammaðar myndir og röndótti gangurinn er líka töff! Alltaf ætlaði ég nú að mála einn vegg röndóttan á heimilinu, ætli það fari að koma að því:)

*Uppfært* 

Búið er að draga út vinningshafa og þá má sjá neðst í færslunni, kærar þakkir fyrir frábæra þátttöku!

Hvað er betra en að byrja daginn á því að gefa 2x 10 þúsund króna gjafabréf í Lindex? Eins og þið tókuð líklega eftir þá var Lindex að opna nýja og glæsilega verslun í Kringlunni sem selur einungis kvenfatnað. Hún er þó bara örfáum skrefum frá minni uppáhaldsverslun sem er Lindex Kids (barna+meðgönguföt) mamman (ég) hefur aðeins fengið að sitja á hakanum undanfarnar 9 vikur því ég er búin að uppgötva hvað það er bilaðslega gaman að versla föt á lítil kríli! Ég “slysast” líka stundum inn í stelpudeildir og hef fundið þar föt á Bjart sem eiga jafn mikið erindi til stráka sem stelpna, Bjartur var síðast í gær í fallegum buxum myndskreyttum kettlingum og hvolpum sem ég fann í stelpudeild í einni verslun erlendis. Síðan hvenær eru kettlingar meira fyrir stelpur en stráka? Síðan voru skírnarbuxurnar hans úr stelpudeildinni í Lindex, þeim fylgdi reyndar bleikur kjóll sem ég er enn eftir að finna nýjan eiganda að, þið hefðuð átt að sjá svipinn á Andrési þegar ég kom heim með það dress haha.

Ég tók saman nokkrar flíkur sem mér þykja vera mjög flottar:)

Skildu endilega eftir athugasemd með fullu nafni ef þú vilt næla þér í 10 þúsund króna gjafabréf í Lindex!

Og ertu svo ekki pottþétt að fylgja Trendnet á Facebook?

Ég dreg út tvo heppna lesendur í kvöld.

Eigið góðan dag:)

*Uppfært*

Þær heppnu sem nældu sér í 10 þúsund króna gjafabréfin í Lindex eru:

Barbara Ann Howard og Hafdís Bjarnadóttir

Vinsamlega hafið samband á trendnet@trendnet.is fyrir frekari upplýsingar:)

Herregud draumabók heimilisperrans er að koma út… Stílistadrottningin Lotta Agaton og ljósmyndarinn Pia Ulin fagna 10 ára samstarfi sínu með því að gefa út bókina Colorful, nafnið á þó fátt sameiginlegt með innihaldi bókarinnar en litir eru eitt sem einkennir ekki stílinn hennar Lottu Agaton.

Þessi er væntanlega núna á næstu dögum en hana er hægt að kaupa í forsölu hér.

Ég elska Lottu Agaton og allt sem hún gerir, ég gerði því tilraun til að kaupa bókina en sænskukunnáttan mín gæti þó mögulega komið í veg fyrir að hún endi í lúgunni minni:)

Ég rakst á þetta einstaklega fallega barnaherbergi á pólska barnablogginu Skandikids.

Þessi litasamsetning er algjört æði, myntugrænn í bland við svart&hvítt!

Fullt af góðum hugmyndum að finna hér!

x svana

Ég er loksins byrjuð að gera barnaherbergið klárt, það tók mig ekki nema 10 vikur að finna “nennuna”:) Ég var nefnilega andvaka í nótt og eyddi ágætis tíma í símanum mínum að skrolla í gegnum Pinterest appið (mæli með því), og er komin með um 270 góðar hugmyndir í albúmið “Kids room”. Ef þið hafið áhuga á að fylgja mér á Pinterest þá getið þið gert það, hér. 

Þetta byrjaði á því að Bjartur var í dag í samfellu sem var svo fallega grænblá á litinn að ég ákvað að mála einn vegg í herberginu í þeim lit, því var skundað í Byko eftir smá sunnudagsstúss og keypt málning og komið við í A4 og keyptir litlir doppulímmiðar. Ætli það séu ekki að vera komin um tvö ár frá því að ég ætlaði mér að gera vegg á heimilinu doppóttan, það hlaut að koma að því á endanum!

Þið afsakið myndgæðin, þær eru fengnar af snapchatinu mínu,

Þetta tók mig svo ekki nema nokkrar mínútur,

Það er langt síðan að þessi var uppá vegg síðast, en finnst hann alveg tilvalinn fyrir barnaherbergi, (keyptur í Hollandi).

Svo ein draslmynd í lokin svo þið sjáið ástandið, það er enn heilmikið eftir!

Hugmyndin er að Andrés smíði hillur fyrir vegginn á móti kommóðunni, einnig er ég eftir að velja loftljós og hengja myndir upp á vegg.

Ég leyfi ykkur að fylgjast með:)

Fylgstu endilega með Svart á hvítu á facebook -hér 

Eruð þið búin að líta á dagatalið ykkar í dag? Jú í dag er nefnilega 24. og það þýðir bara eitt, mánuður til stefnu!

Mér finnst mjög fallegt að vera með lítið jólatré í vasa eða jafnvel í potti, þetta er svona aukajólatré sem getur þessvegna farið mun fyrr upp en hitt sem verður svo skreytt alveg hátt og lágt.

Lítið jólatré eða grein, pínulítið eða örlítið stærra? Mér finnst aðaltrixið vera helst að hafa tréð sem látlausast.

Það má sko alveg skella einu svona upp í nóvember:)

Fylgstu endilega með Svart á hvítu á facebook -hér 

Hér í herberginu hans Bjarts er allt að smella hægt og rólega, ég hengdi a.m.k. upp fyrstu myndina áðan!

Bjartur fékk þessa fallegu teikningu í skírnargjöf frá vinkonu okkar henni Bergrúnu Írisi. Hún Begga er nefnilega ótrúlega hæfileikaríkur teiknari og eitt af hennar nýjustu verkum eru þessir fallegu loftbelgir, á teikninguna eru svo bætt við inní lítil ský öllum fæðingarupplýsingum ásamt nafni barnsins.

Svo fer þessi krúttlega ugla eftir hina teiknivinkonu okkar, hana Heiðdísi næst uppá vegg.

Bambann fékk Bjartur í skírnargjöf frá frændfólki sínu og spiladósina gáfu vinnufélagar pabbans honum ásamt fleiru. Allt mikið smekkfólk þar á ferð:)

Til eru nokkrar útgáfur af loftbelgjunum, hver öðrum fallegri og koma þeir í takmörkuðu upplagi. Okkar er með dýraþema:)

Hér að neðan má sjá nokkrar ólíkar týpur af loftbelgjum,

Okkur Beggu langar til að gleðja einn heppinn lesanda með nýjasta lofbelgnum frá henni með MARMARA þema:)

Þessi er einstaklega flottur, og verður enn flottari þegar búið verður að bæta inní öllum fæðingarupplýsingunum.

Til að eiga séns á að eignast þessa fallegu teikningu þarftu að skilja eftir athugasemd hér að neðan og vera búin/n að líka við Óskalistann á facebook en það er síðan hennar Bergrúnar Írisar þar sem hægt er að fylgjast með allri snilldinni sem hún býr til:) Ásamt því að teikna loftbelgi þá gefur hún nefnilega út barnabók, myndskreytir allskyns aðrar bækur og plötuumslög, málar málverk, veggmyndir, leikmyndir og svo margt margt fleira!

Taktu endilega þátt, við drögum út á morgun:)

x svana

Ég alveg er dottin í föndurgírinn og næst á dagskrá er að týna köngla og draga upp límbyssuna. Ég er alveg á því að föndur er sko alls ekki neitt hallærislegt og það er vel hægt að búa til mjög fallega hluti í höndunum (eins og þið vissuð vonandi!)

Það helsta sem þarf að huga að fyrir könglaföndur er að sjálfsögðu að skola könglana og þurrka svo vel til að fá ekki pöddur skríðandi úr jólaskrautinu, það er sko ekkert jóló við það.  Ég myndi mæla með að þurrka þá á dagblaði í 2 daga á hlýjum stað, helst þó útí bílskúr. Svo er bara að annaðhvort spreyja þá, mála, skella á glimmeri eða hafa þá au natural.

Ég ætla að skella í svona köngla á bandi til að hengja í gluggann og er svo að íhuga að gera útihurðarkrans í fyrsta skipti ásamt nokkrum stökum til að skreyta aðventukransinn með.

Talandi um aðventukrans/kertastjaka þá rissaði ég einn upp í kvöld sem verður smíðaður á morgun, vonandi lukkast hann vel og þá sýni ég afraksturinn. Hann lúkkar allavega nokkuð vel í höfðinu á mér:)

Fyrir áhugasama föndrara þá mæli ég með Pinterest fyrir allskyns könglaföndurshugmyndir, hægt að slá inn “Pine cone christmas crafts”

P.s. Vinningshafinn í Loftbelgjaleiknum var hún Unnur Kristjánsdóttir!

“Einkasonurinn yrði meira en lítið hrifinn af þessum fallega loftbelg (og mamman ekki síður) þar sem hann hefur verið að velta sér upp úr loftbelgjum síðustu vikurnar og framkvæmt hinar ýmsu tilraunir. Virkilega hæfileikaríkur listamaður hún Bergrún.” 

Kæra Unnur, sendu mér endilega póst á svartahvitu@trendnet.is

x svana

Hversu notalegt er að eyða föstudagskvöldi í smá föndur:)

Ég krossa fingur að þesssi blessaði aðventu”krans” minn heppnist en ég er ennþá að ákveða hvort þetta var sniðug hugmynd. Næst er þá að skreyta hann smá og svo vonandi sýni ég lokaútkomuna.

Æj og svo smá Andrés og Bjartur með á myndinni, það má:)